ENTREVISTES » 23-02-2022  |  CENSURA I LA MANIPULACIó
2990 lectures

Molière faguèt sas primièras pèças a Besièrs

«Molière faguèt sas primièras pèças a Besièrs, es aquí qu’aprenguèt a far la comèdia, al contacte del pòble occitan». Entrevista de Jornalet a Alexandre Pesson, responsable iconografic del projècte 'Molière Face Sud'.

Alexandre Pesson es lo responsable iconografic del projècte “Molière Face Sud”, creat pel Teatre de la Carrièra e la Fabrique Sauvage

-Parlam amb lo responsable iconografic del projècte Molière Face Sud, creat pel Teatre de la Carrièra e la Fabrique Sauvage.[…] As participat, amb una còla d’afogats, a fargar un projècte a prepaus Molière :  nos en pòdes dire un pauc mai?

Soi tanben colleccionaire de sagèls e de cartas postalas, e president del Cercle dels Colleccionaires de Pesenàs. Ai escrich un libre, Le Piscénois pendant la Grande Guerre. Banhar dins aquel mitan m’a permés de rescontrar Claudi Alranq, lo fondador del Teatre de la Carrièra, que s’es fisat de ieu, de mas competéncias de colleccionaire de cartas postalas e d’organizaire de mòstras. E doncas es el que me presentèt lo projècte montat pel Teatre de la Carrièra e la Fabrique Sauvage. Soi vengut lo responsable iconografic del projècte.

E justament, nos pòdes parlar mai en detalh d’aquel projècte?

Lo projècte se ditz “Molière face Sud” (Molière fàcia Sud) perque ongan festejam l’anniversari dels 400 ans de la naissença del mai celèbre autor francés de comèdia. Pr’aquò, sabèm que Molière viatgèt dins lo sud, de Bordèu a Tarascon entre 1642 e 1657, del temps qu’èra jove, abans d’èsser conegut a Versalhas. De 20 ans a 32 ans, faguèt una mena de viatge iniciatic, per çò que coneguèt los carnavals e las fèstas del sud de França, rescontrèt benlèu Godolin e de poètas occitans. Lo rescontre amb Godolin es fòrça probable mas pas atestat, per contra amb d’autres, aquò es segur. Vos caldriá entrevistar Claudi Alranq per ne saber mai sus aquò! Mas lo fach que farguèt sa mentalitat, tot l’esperit de son òbra dins lo sud de frança, es pas un mite.


Molière e sa memòria son demoradas
plan vivas a Pesenàs, e fins aquestas
darrièras annadas, los vièlhs contavan
encara d’istorias qu’avián ausidas de
lors rèires.

Molière faguèt sas primièras pèças a Besièrs, es aquí qu’aprenguèt a far la comèdia, al contacte del pòble occitan. Es una istòria amagada per l’istòria oficiala de França. Molière e sa memòria son demoradas plan vivas a Pesenàs, e fins aquestas darrièras annadas, los vièlhs contavan encara d’istorias qu’avián ausidas de lors rèires. Uèi aquò s’es perdut mas tot es estat consignat dins los libres. Lo projècte es destinat a far conéisser aquela istòria esconduda. Concretament, se declina en quatre elements: un roman de Claudi Alranq, Au Sud de Molière, una conferéncia teatralizada, Molière Face Sud, una pèça de teatre e una expausicion que ne soi lo responsable e producha amb l’ajuda del CIRDÒC-Institut de Cultura, que presenta d’illustracions del passatge de Molière dins lo sud (ai una banca d’imatges fòrça garnida) e de dessenhs de Gérard Garcia. Cal notar enfin que la lenga occitana aurà sa plaça pertot, amb lo francés, per tocar totes los publics, coma dins totes los projèctes de Claudi Alranq. Totas las vilas qu’o desiran pòdon aculhir lo projècte dins son ensemble. L’annada 2022 es l’annada Molière, la cal pas mancar!

Dimenge, 23 de genièr de 2022,

ENTREVISTAS

Etiquetas
entrevistamolièrepesson


Enllaç: 

https://www.jornalet.com/entrevista/14568/moliere-faguet-sas-primieras-pecas-a-besiers-es-aqui-quaprenguet-a-far-la-comedia-al-conta



Autor: Jornalet

Publicat a www.inh.cat - Institut Nova Història